Uns ist in alten mären wunders vil geseit
Von helden lobebären von grôzer arebeit
Von fröuden hôchgezîten von weinen und von klagen
Von küener recken strîten muget ir nu wunder hören sagen

Ez wuohs in Burgonden ein vil edel magedîn
Daz in allen landen nicht schöners mohte sîn
Kriemhilt geheizen si wart ein scöne wîp
Dar umbe muosen degene vil verliesen den lîp

Der minneclîchen meide triuten wol gezam
Ir muoten küene recken niemen was ir gram
Âne mâzen schöne sô was ir edel lîp
Der juncvrouwen tugende zierten anderiu wîp

Ir pflâgen drîe künege edel unde rîch
Gunther unde Gêrnôt die recken lobelîch
Und Gîselher der junge ein ûz erwelter degen
Diu vrouwe was ir swester die fürsten hetens in ir pflegen

Die herren wâren milte von arde hôhe erborn
Mit kraft unmâzen küene die recken ûz erkorn
Dâ zen Burgonden sô was ir lant genant
Si frumten starkiu wunder sît in Etzelen lant

Ze Wormez bî dem Rîne si wonten mit ir kraft
In diente von ir landen vil stolziu ritterscaft
Mit lobelîchen êren unz an ir endes zît
Si sturben sît jämerlîche von zweier edelen vrouwen nît