Upe ka'arúpe ahami nde piári
Pukavy pa'ûme ahecha reju
Ne ryakuã oguerúma omyasãi che ári
Tenonde og̃uahêva yvytu peju

Rohuguaitîkuére cheretûmbamíma
Che po nde ku'áre ha ñasê jaha
Nde pire añandúvo chepirî pirîma
Kavaju popóicha pe ñe'ãkua

Pytãngy pe ára okañynguetévo
Kuarahy oikéma, otî ndehegui
Péina ohesapéma pytûmby og̃uahêvo
Ñasãindy rendýicha nde resa mimbi

Pytû oñemoirûma ñane mborayhúndie
Ha kiriîhápe ñanemboahoja
Guyraita okepáma japyta yvytúndie
Mborayhu hypýpe mokõive jaha

Ndaikuaái mba'épa che kuã nde áva kuápe
Ombohyrupávo oiméva oheka
Nde pire ikyrỹiva cherapy hatápe
Ha oje'o che kûre ne rembe pytã

Pytãngy pe ára okañynguetévo
Kuarahy oikéma, otî ndehegui
Péina ohesapéma pytûmby og̃uahêvo
Ñasãindy rendýicha nde resa mimbi

Mborayhu ru'ãme ag̃uahênguetévo
Yvága rokêmevaicha añemboja
Nde juru mbytépe ajupi hekávo
Vy'a ijoja'ỹva jahupytyha