Angepyhare yvága hovy ryakuã yvoty guýpe
Rohecha ypy, mba’e neporãva mborayhu memby
Che py'a rory añandu ikyrỹi ajávo ndeypýpe
Romomorãmi mba'éicha rupípa ãicha ndejuky

Márõ ndejave che remimbyasýpe oiméne iporãva
Ha imarangatúva nde reko yvotýpe kuñataîmi
Nahi’ãipa ndéve, che retã memby, che'ã reraháva
Ne rembe kyrỹi mborayhu ykuágui chemboy’umi

Pévare ajapo ndéve purahéi ñane avañe'ême
Naimo'ãigui oime ambue ñe'ême he'êmbochyve
Ha ipype ahypýi che rembiay'uhéi ysapy satîme
Aropurahéivo ndéve aropojái mborayhupavê

Nahi'ãiko che ku ijaheipy tesaráipe oikóva
Pévare aju ndéve aropojái che ñe'êyvoty
Chéko avei ambueichaite aporohayhúva
Ha ndéve g̃uarã che ñe'ã mbytégui péinama ipoty

Ndoje'oiva'erãi pe nde pukavy che resa'ỹikuágui
Romoñe’êhápe nderehe ama’êvo angepyhare
Hi’ã roañuã romokunu'û ko che jyva ári
Tove toikuaa mayma ohecháva che vy’apavê

Nde ratypykua eirete yvu he'ê paha’ỹva
Yvága poty hory kangymíva nde resa jajái
Ha ne ñemonde ryakuã potî hyjuipareíva
Ndejojaha'ỹ, máva ndejave kuña Paraguái