Hoilibheag hilibheag hó ail il ó
Hoilibheag hilibheag hó ró i
Hoilibheag hilibheag hó ail il ó
Smeòrach le Clann Dòmhnaill mi

Smeòrach mis' air ùrlar Phaibil
Crùbadh ann an dùsal cadail
Gun deòrachd a théid nas fhaide
Truimid mo bhròin thòirleum m' aigne

Smeòrach mis' air mullach beinne
'G amharc gréin is speuran soillear
Théid mi stòlda chòir na coille
Bidh mi beò air treòtas eile

Ma mholas gach eun a thìr féin
Cuim' thar éis nach moladh mise?
Tìr nan curaidh, tìr nan cliar
An tìr bhiadhchar fhialaidh mhiosail

Measg Chlann Dòmhnaill fhuair mi m' altrum
Buidheann nan seòl 's nan sròl daithte
Nan long luath air chuantan farsaing
Aiteam nach ciùin rùsgadh ghlas lann

Na fir eòlach stòlda stàideil
Bha 's a' chòmhstri stròiceach scaiteach
Fir gun bhròn gun leòn gun airtneul
Leanadh tòir, is tòir a chaisgeadh

Buidheann mo ghaoil nach caoin caitean
Buidheann nach gann greann san aisith
Buidheann shanntach 'n àm bhith aca
Rùsgadh lann fo shranntraich bhratach