Ne mandu'ávapa nde
Akóina ko ka'aru
Che guataháguio aru
Tupã rymba porãite
Ñuhãme jeitypyre
Guyra ñu para'imi
Ako ñane ynambumi
Jahayhuetémi va'ekue

Mokõivépako jaiko
Ñañombopópe hese
Ñahetû, ñemoñe'ê
Ha mitãicha jareko
Ha'éanga pe ikorasõ
Hasývaichante ichupe
Ha oiméneningo ra'e
Hi'aguîgui upe imano

Upéintepako iko'ê
Ikangy, hasykatu
Ha vokóima rejuhu
Tupaguýpe he'õngue
Okúivaekue umi hague
Rembyaty reñongatu
Ha rehupi rehetû
Ne rymbami retekue

Ne rasêpako ha ere
¡Oho ñane ynambumi!
Oiméne ha'e uvei
Yvágapema oguahê
Upévantepako che
Ambyasy, nambyasypái
Ha mokõivéva ojovái
Ko'ýte ñane rasê

Nde haguãntema, kuña
Resê reho mombyry
Ha remyasãi vy'a'ỹ
Che rekovépe guarã
Ha che katu apyta
Ñaimo'ã ku tyre'ỹ
Amoby'u che resay
Ne kunu'û rekovia

Ako ñane ynambumi
¿Ne mandu'ávapa nde?
Akãngytápe kuehe
Ajuhu haguekuemi
Amoñe'ê katui
Ha che kûguýpe ha'e
Péichante va'erã ra'e
Mborayhu ogue avei