wie geits, wie schteits ?
mou merci, es muess, mir wei nid chlage
i meine, gäu was wosch ?
me het ja o nid d weli
ja nu guet, äbe gäu
item, we me dänkt
im ändeffekt, was söus?
weischwinimeine?
ja henusode, gäu, es chunnt wies muess
& chly schpatzig het me ging
& das isch sträng gseh ja würklech o nid nüt
i meine, eine derna dä würd jitz villech
chlage
guet, a la bonöör, sigs haut eso
aber äbe, gäu, was wosch?
weischwinimeine?
es geit mau so & mau so
mau ufe & mau abe, mau füre & mau zrügg
es isch nid dr red wärt, was söu me da no
säge?
es isch gäng wie gäng
es chöme de scho öppe wieder angeri zyte
i meine, gäu, du weisch ja wies isch
auso de, merci gäu!
mach nümm z lang
& seisch e gruess deheim
& bis es angers mau
irgendwie gseht me sech de scho
i meine, d wäut isch ja chly
nume no schnäu, wäge vori, i has de nid so
gmeint
aber äbe, gäu, was wosch?
me seit ja no viu dr lieb läng tag
weischwinimeine?